You are here
OSH_002035_0.jpg

Tilgangur áhættumats

Vinnuveitendur á hverjum vinnustað bera almenna skyldu til að tryggja öryggi og heilsu starfsfólks á allan hátt í tengslum við vinnu þess. Tilgangur áhættumats er að gera vinnuveitandanum kleift að grípa til nauðsynlegra aðgerða til að tryggja öryggi og heilsu starfsfólksins.

Slíkar aðgerðir eru t.d.:

  • að fyrirbyggja hættur á vinnustað;

  • að veita upplýsingar til starfsfólks;

  • að veita starfsfólki þjálfun;

  • að sjá um skipulagningu og innleiðingaraðferðir á nauðsynlegum aðgerðum.

Þó svo að tilgangur áhættumats sé að koma í veg fyrir hættur á vinnustað, og það ætti alltaf að vera markmiðið, er það ekki alltaf mögulegt í reynd. Þar sem ekki er hægt að útiloka hættur þarf að lágmarka þær og stýra þeim sem eftir verða. Síðar meir, í endurskoðunarferlinu, eru hættur sem eftir verða metnar á ný og möguleiki á að útiloka hættuna, hugsanlega í ljósi nýrrar þekkingar, endurskoðaður.

Áhættumatið á að gera og beita með þeim hætti að það hjálpi vinnuveitendum að:

  • greina hættur sem skapast við vinnu og meta áhættur í tengslum við þessar hættur til að ákvarða aðgerðir sem grípa þarf til í því skyni að vernda heilsu og öryggi starfsfólks þeirra og annarra starfsmanna, með tilliti til lagalegra reglugerða;

  • meta áhættur til að taka upplýsta ákvörðun um starfsbúnað, efni eða blöndur sem á að nota, framkvæma úttekt á vinnustað og skipulagningu vinnu;

  • athuga hvort að aðgerðirnar sem eru til staðar séu fullnægjandi;

  • forgangsraða aðgerðum ef matið leiðir í ljós að þörf sé á frekari aðgerðum;

  • sýna fram á gagnvart þeim sjálfum, lögbærum stjórnvöldum, starfsfólki og fulltrúum þeirra að allir þættir sem varða vinnuna hafa verið skoðaðir og að upplýst og gild ákvörðun hafi verið tekin um áhættur og nauðsynlegar aðgerðir til að tryggja heilsu og öryggi;

  • tryggja að fyrirbyggjandi aðgerðir og starfs- og framleiðsluaðferðir sem teljast nauðsynlegar, og voru innleiddar í kjölfar áhættumats, feli í sér aukið öryggi fyrir starfsfólkið.